前台灣總統陳水扁一家的連串弊案終於在昨天開始陸續得以宣判，今日香港多份報章都以此作為Ａ１頭版。事先聲明，Y.Y.只屬塘邊鶴，以下言論如果對台灣Bloggers中的阿扁死忠粉絲有任何得罪，請多多包涵，哈哈。
還是決定用廣東話寫下去，傳神Ｄ嘛。
話說尋日聽新聞時知道扁家案第一宣判，吳淑珍判一年，但減刑一年；扁仔，扁女同女婿各判一年，但又減刑半年。聽到之後我第一個反應係：下？！唔係下化？！ 審左咁耐，搞左成年幾兩年，全世界都知佢一家貪到出哂汁，都只係判得０個一年？！ 好抵姐～～ 貪左幾億都只係坐一年，仲話好似可以用勞動服務抵銷唔洗坐，簡直係有“ｓｏ”啦，咁我都唔介意去貪呀。 唔洗十八年後都已經又係一條好漢喇～～～ 我斷唔信佢地收埋起海外既錢全部都拎番哂出黎，最多坐完一年之後冚家離開台灣，遠走高飛，繼續嘆世界，得閒又可以放番ｄ消息返台灣，繼續對台灣政壇指指點點，幾過癮～～～
好彩～～了解清楚之後，原來～～～我誤會左少少，尋日宣判既只係國務機要費案衍生既偽證案，暫時只係判左佢地做偽證妨礙司法公正罪成，唔係話貪污貪到九彩都只係判一年兩年咁少～～嚇得我～～
不過吳淑珍仲要去怨法官，話佢都肯認哂罪咯，點解都唔俾條生路佢仔女，又話驚佢個女又會再次情緒崩潰。 喂，大佬呀！！宜家認罪大哂咩，認罪就可以等於無罪呀？！ 如果法官俾條生路你，咁邊個俾條生路台灣既司法制度呀？！
有時真係唔知台灣人係天真還是愚昧，明明個總統貪左咁多自己國家既錢，到左今時今日，竟然仲會有人企出黎講，“寧願要一個貪污既總統，都唔要一個無能既總統”。唉～～真係無話可說，希望LEE個只係佢地一時之氣既悔氣之言啦！另外，之後睇ＴＶＢＳ的風災新聞，報導扁女婿趙建銘去災區義診，有個婆婆話行幾兩個鐘專登過去睇醫生，仲話：“我知道總統個女婿過黎義診，我當然要趕過黎俾佢睇啦”。 天呀～～～～搞咩呀～～我馬上頭上有三劃。 婆婆，妳係唔知總統已經換左人，還是唔知扁家貪污呀～～～
最後要講講報紙揀相有時真係好抵死，真係唔樣衰０個張佢地唔登，睇下扁嫂兩母女ｌｅｅ個樣，真係唔知應該要笑，還是要同情佢地先好～～～
所以講，真係唔好做錯事呀！阿扁標榜致力追求民主，要帶台灣人走出紅海，點知自己心術不正。 所謂天子犯法與庶民同罪，體現民主社會，首要的元素，就是要體現司法既公正。
